Бүрхэг өдрүүдэд би дуртай

Хавар, зун, намар өвөл гэлтгүй ер нь бүрхэг өдрүүдэд би дуртай. Тэнгэр газар 2 санаашрангуй амирлах мэт тийм л өдрүүдэд учиргүй хайртай. Бороо шивэрч, цас бударсан бүүдгэрхэн тэр л өдрүүдэд сүнс минь биеээсээ гарч эрх чөлөөг мэдрээд, нэг л гуниглангуй эргэж ирэхийг нь би мэдэрдэг. Өнөөдөр яг л тийм бүүдгэрхэн өдрүүдийн минь нэг байна. Дахиад надтай олон учраасай энэ өдрүүд...

Чамд заавал эрх чөлөөг олгоноо ...

Учиргүй уйлахыын хүслэнд автаад, юу юугүй нүдны минь аяга нулимсаар дүүрээд ирэхийн цагт тэсгэл алдан чанга чанга инээд алддаг. Сэтгэлд минь байгаа тэр л зүйлс надтай хамт үлдэг гэсэндээ шорвог ус минь чамайг үдээд гаргачихаж чадахгүй нь. Тэнд миний бүх нууц байгаа болохоор чанга гэгч нь инээгээд залгихаас өөр арга алга даа найз минь уучлаарай! Хорвоогоос хагацах тэр мөчид харин чамд эрх чөлөөг харин заавал олгоноо анд минь, амлая! Тэр хүртэл дотор минь бай, тэгэхгүй бол би хов хоосон болох нь...

Би бороонд учиргүй дуртай.

Би бороонд учиргүй дуртай. Жигдхэн эгнүүлэн тарьсан мододтой замын голоор би алхалдаг. Энэ л замаар алхалж явахад минь цасан ширхэгүүд хаа сайгүй бужигнаж хэн нь хөөрхөн бэ? хэн нь хөөрхөн бэ? хэмээн ам булаалдан байхад би бороог л хүлээж байдаг. Навчис зөөлхөн гуйж хөл дор минь унаад намайг анзаараач, намайг анзаараач гэж гунигтайгаар ойчилж байхад би бороог л бодож явдаг. Хөөе чи хөөе чи гэж хамаг байгаа бүхнийг минь хийсгэчих гээд салхин намайг чангааж байхад би бороог л санаж байдаг.
Удахгүй хэзээ гэдгийг нь хэн ч мэдэхгүй ч, урь идэгдсэн ертөнцөд урьд урьдынхаас илүү сайхан бороо асгарч, баяртай гэж энэ хаварт хэлэх бол.


Таван амт

Хавар, зун, намар, өвөл, дахиад л ... хавар

Бүх зүйл шинээр дэлгэрч, шинээр эхэлж, урган төлждөг хавар ирчихлээ. Удахгүй хүн бүрт ямар нэгэн зүйл үлдээгээд л яваад өгнө. Зун болж тэр үлдсэн зүйл нь улам сайхан болж аль эсвэл гундаж хагдараад мартагдаж хоцорно. Тэгээд л намар болж ухаарал бодорол нэмсэн том том навчист дарагдаад, лавсан орох цасыг хүлээнэ. Гэвч дахиад л хавар ... ирдэгээрээ ирнэ.


Таван амт

Хэзээ ч уулзаж чадахгүй хонгорхон найз Тэнүүндээ

Чамаас захиа иржээ. Гэхдээ би тэрийг чинь дөнгөж өчигдөр л уншлаа. Надад гомдоогүй биз дээ. Хатуу хирнээ үнэн үгтэй юмаа гэж ээ, чи намайг. Ингэж үнэлсэнд чинь баярлаж байна. Өмнөх захианы чинь хариу таалагдсангүй юу? Яагаад ингэж удаан захиа бичсэнгүй вэ? Заримдаа, үе үехэн үгүйлдэг байсан шүү чамайг. Төрсөн өдрийг минь мартаагүйд байрлалаа. Гэхдээ би чиний төрсөн өдрийг одоо болтол мэдээгүй л байгаа?! Хэзээ нэгэн цагт хэлэх байх гэж найдаж байна. Зүсийг чинь үзээгүй ч хоолойг чинь сонссон болохоор сайхан байнаа. Хамгийн ихээр намайг ойлгож хайрладаг хонгорхон найз минь, хаана яваагаа ядаж надад хэлээч...?


Таван амт

Нэг л мэдсэн амьдрал дэргэдүүр минь өнгөрчихөж

Зөөлөн зөөлнөөр элсээр он цагийн хүрдэн дахиад нэг эргэчихэж. Нэг л гунигтай ч юм шиг бас баярламаар, бахархмаар ч юм шиг тийм нэг жилийг ардаа үдчихэж. Найзуудын маань хэлдэгээр овоохон шороо хөдөлгөжээ. Ингээд л бас дахиад нэг нас нэмчихлээ. Бялуун дээр хатгасан лааг унтраахын өмнө толгойд минь аз жаргал гэдэг үг зурсхийсэн. Яагаад ч юм миний танидаг бүх хүмүүс аз жаргалтай байгаасай л гэж хүссэн. Тэр хүсэл маань ч биелэх байхаа. Жил бүрийн төрсөн өдрөөрөө гунигт автдаг маань гэм биш зан болжээ. Өөрийнхөө төрсөн өдөрт дургүй байдаг маань ч үүнтэй холбоотой байж болох л юм. Намайг хараад баярлах найз нөхөд гэр бүлийнхэнээ хараад л тайвшрах юм даа. Эргээд харахад би энэ хугацааг дэмий өнгөрөөчихөж. Амьдрал нэг л мэдсэн дэргэдүүр минь өнгөрчихөж. Залуу нас минь түүнд ухаангүй дурлачихаад араас нь юу юугүй яваад өгөхнээ...


Таван амт

Хэзээ ч уулзаж чадахгүй ч үргэлж намайг хайрлаж байдаг тэр найздаа...

Хонгорхон найз минь, сүүлийн захиаг чинь уншсаан. Намайг хамгийн үнэтэй нулимсаа хүнд битгий үзүүл гэжээ. Тэгнээ би үзүүлэхгүй. Тэр өдөр тэнгэр хүртэл намайг хайрлахдаа цасаа явуулсаныг чиний захиаг уншаад л ойлголоо. Гайхалтай байсан тэр цас. Дараа төрөлдөө заавал уулзана гэсэн үг чинь хамгийн сайхан нь байлаа. Захиаг чинь унших бүр чамд дасаж байна. Бага багаар үгүйлдэг болсоор л. Магадгүй чиний захиаг уншаад ганцаараа ч амьдарч чадах юм шиг санагддаг боллоо. Ингэж хэлж байгааг минь уучлаарай. Гэхдээ хэзээ нэг өдөр надад өөрийг чинь мартахыг зөвшөөрөөрэй.
Дэр нийлүүлж амьдрахгүйгээс хойш
Өөртөө намайг бүү дасгаач
Дэндүү эмзэг гэнэн сэтгэл минь
Дасчих нь байна холхон яваарай...


Таван амт

Би нь МОНГОЛдоо...

за би нь ойрд энэ блог гээчид нь орж ирэлгүй их уджээ. Ямартаа ч төөрсөөр төрөлдөө гэж яаж ийж байгаад МОНГОЛдоо ирлээ. Хичнээн сэтгэл хангалуун байна гээч. Манай таванамт мөн их уянгын халил болох юм аа. Би нь энэ хүнтэй сайн найзууд гэдэгтээ заримдаа итгэхэд ч бэрх байх юм. Байнга л утга уянга шүлэг дуулал болсон энэ хүний дэргэд би гэдэг чинь нэг л модон хөшөө.
Ирлээ гээд хөөрөөд хэдэн найз нартайгаа сууяа гээд нэг гарсан биш аниа тас компаны захирал болоод хөөрхий хэн нэгэнд шал хэрэггүй үг олон хэлсэн бололтой. Зарим нэг нь гомдоллоод байх юм. Гэтэл би гэдэг чинь уг нь уянгын халил муутайм болохоороо үгийн сонголт муутай. Тэрэндээ ч бодож байснаа хэлээд тавчихсан биз.
МОНГОЛдоо ирнэ гэдэг миний хувьд хичнээн сайхан байгааг, найз нараа хараад хичнээн баярлаж догдолсныг тэд анзаарсангүй. Нэг л том хүмүүс, биеэ цэнэж хэн намайг юу гэх бол гэсэн янзтай. Уг нь уулзаагүй удсан юм чинь хэн хэнийгээ гэхгүй сайхан уулзалт болох байх гэж мөн ч их найдсансан. :(
Намайг тэр холоос ирэхийг минь миний муу таван амт, ээж 2-с минь өөр хэн ч хүлээгээгүй бололтой. Өөр хэн ч хүлээх билээ дээ... Гэхдээ МОНГОЛдоо ээжтэйгээ таванамттайгаа байх сайхан байна аа...

Бүгдэд нь амжилт хүсье!

Намайг таних бас танихгүй эрэгтэй, эмэгтэй гэрлэж, хайраа олж амжаагүй бүх хүмүүст ийм л хайрыг олоорой гэж хүсье!

Бүх ганц бие найзууддаа

Би зүгээр л зүрх хайж яваа хайр байна.Зүрхэнд чинь өрөө хөлслөх гэсэн юм. Түрээсэнд нь хувирашгүй сэтгэл үүрдийн хайраа өгье! Төлбөр нь таалагдаж байвал хариу бичээрэй. Гэхдээ би ганцхан өрөөтэй зүрх хайж байна. Гэгээлэг наран талдаа цонхтой байх ёстой шүү!


Таван амт

Би уйлж байна
Би өвдөж байна
Би шаналж байна
Би сүнс юм байна


Таван амт

Үргэлжлэл

Би урсаж байна
Чимээгүйхэн алгуур алгуурханаар урсаж байна
Би лаа юм байна

Би замхарч байна
Сэмхэн аяар аяарханаар замхарч байна
Би зэрэглээ юм байна

Би үхэж байна
Өчүүхэн бага багаар үхэж байна
Би хүн юм байна

Үгүй ээ...
Би би би...
Би хэн юм бэ?


Таван амт

Хэзээ ч юм нэг өдөр тэмдэглэлийн дэвтэртээ ингэж бичиж...

Цээжинд зүрх булгилна
Тархинд бодол буцална
Чи хэн юм бэ?
Чи хэн юм бэ? гэж бүгд асууна
Харин тэр хариуг би
Хаанаас ч олж чадсангүй


Таван амт

БИ ДУРГҮЙ

Хэн нэгэн намайг өрөвдөхөд би дургүй

Хэлсэн үгийг минь ойшоохгүй байхад би дургүй

Хүсээгүй бүхнийг минь надад сануулахад би дургүй

Хүн хүнээс илүүтэй хуурч мэхлүүлэхэд би дургүй

Зүрх сэтгэлийг минь хэлэхгүйгээр булаахад би дургүй

Зүүд нойронд минь зөвшөөрөлгүйгээр айлчлахад би дургүй

Зөвлөж хэлэлгүйгээр өмнөөс минь шийдвэр гаргахад би дургүй

Зөв бурууг ч ялгалгүйгээр надруу чичиж ярихад би дургүй

Бүрэнхий үдшээр ганцаар алхах би дургүй

Битүүхэндээ хэн нэгнийг хүлээх би дургүй

Боловсон зан гаргаж худлаа дүр эсгэхэд би дургүй

Байгаагаараа байж чадахгүй хорвоод бусдынхаар байх би бүүр ч дургүй

Таван амт

"Би" - бий болно

Баяр гунигийн солонгон туяаг хэрж "Би" амьдардаг

Буруу энгэртэй дээл шиг буруу, будлиу, болхи өөртэйгээ тэрсэлдэнэ

Буруу ишилсэн сүх шиг буруу, тэрсүү, давруу орчлонтой тэрсэлдэнэ

Баруун зүүний тасархай, байх байхгүйн эмтэрхий "Би" -бий болно

Буурал хорвоог бусдын адил элээх л хойно

Буруу зөвийн нугачаанд бүдэрч тэнцэж амьдархаас л хойно

Байх ёстой газраа байх ёстой үнэн нь байгаа л хойно "Би" -бий болно

Хүний нүдэнд илүү харагдаж

Хэлний зугаа, хэрүүлийн үзүүрт нэр минь холилдож

Худал, үнэний дэнсэн дээр чигийн зүү буруу заавч

Хөлбөрч, хувиралгүй "Би" -гээрээ л амьдрах болно

Өөдлөх цагт "Би" миний бахархал байна

Уруудах цагт "Би" миний харамсал болно

Өлсөх цагт "Би" миний идэш байна

Цадах цагт "Би" миний өглөг болно

Буруу ч, зөв ч

Бусдын ертөнцөд худалдагдахгүй

"Би" -бий болно

Өтлөх цагт "Би" миний түшиг болно

Үхэх цагт "Би" миний гэрч болно

Үгүйлэхүй үгүй болохын цагт "Би" миний дурсгал болно

Би өөрөө "Би" байж чадах аваас

Бүх цаг хугацаанд "Би" мөнх оршино

"Би" -бий болно

Таван амт

Миний дуртай шүлгүүдээс

Нэг л мэдэхнээ, он цаг урсчихаж...

Цаг хугацааны аянган хүрдэнд

Чиний нулимас бороо болж

Над дээр асгарна

Би хэнэггүйхэн норж

Чамд мэдэгдэлгүйхэн алхана

Бурхадтай наргих жаргалын хүрээлэнд

Чиний инээд жавар болж өвөр цанттал салхилна

Би гудиггүйхэн даарч

Чамд хэлэлгүйхэн алхална

Хөөсрөн сагах дарс шиг

Хүний эмх замбараагүй орчлонд

Ирэхгүйг чинь би мэдсээр байж

Их удаан хүлээчихжээ.

Нэг л мэдэхнээ, Он цаг урсчхаж дээ

Таван амт

Миний хүсэл хортой

Бодол минь уруугаа ургаад

Шаналж өвдөөд

Хорсож зэвүүцээд

Атаархаж уурлаад

Миний хүсэл – МУУХАЙ

Ургах тусмаа улам ширэлдэж

Удахгүй түүндээ төөрч орхино

Урт өргөсөнд нь хатгуулаад

Улаарсан бух шиг болно

Миний хүсэл -ХОРТОЙ

Хаврын салхи хавирга нэвтлэх шиг

Хавьтсан ойртсондоо үсчих чонос мэт

Ааш нь олдохгүй янтгар хүүхэн шиг

Миний хүсэл -ХУВЬСАМТГАЙ

Хийлээд л байвал дүүрээд байх бөмбөг шиг

Хэзээ хаграхаа мэдэхгүй шунал шиг

Гэдэс цадсан ч сэтгэл цадахгүйн зовлон шиг

Миний хүсэл- ХАНАШГҮЙ

Таван амт

Чи л битгий...

Дон дон хийгээд хөг ордоггvй ятга шиг

Догдлохоо больсоон, энэ муу сэтгэл

Уянгатай сайхан vг, хайрын харц, халуун амьсгаанд

Уярахаа больсоон залуу минь, намайг бvv зовоо

Хийсээд л байсан, нисээд л байсан тэр намрын навч

Хийлийн эгшиг цурхирах шиг би уйлаад л байсан

Толгой өндийлгөж дараа нь уужранхан бодоод

Тоохоо больсоон, дурлал хайр гэдгийг чинь

Хөдлөхөө больсоон, энэ муу сэтгэл

Хөөрхий минь юугаар хуурдаг билээ

Хөндөлсөж зам дээр битгий хvлээ

Хөсөр хаясаан би залуу насаа, чи л битгий тэгээрэй

Таван амт

Учрахсан

Учрахсан гэж дурлалыг удаан хүлээлээ
Уярахсан гэж хайрыг би удаан хайлаа
Газар дэлхий дээр дурлагсад зуу зуугаараа байхад
Гагцхүү намайг л тойрох нь юуны учир вэ

Дурлахсан,
Дурлахсан гэж он цагийг туулан хүлээлээ
Дуулахсан гэж орчлонг аргадан шүлэглэлээ
Дуулим хорвоо дээр хүмүүн мянга мянгаараа байхад
Даанчиг намайг л тойрох нь юуны учир вэ

Хайрлахсан,
Хайрлахсан гэж хэн нэгнийг өчнөөн хүлээлээ
Хайлахсан гэж зүрхээ чагнан төчнөөн эрлээ
Хөрст дэлхий дээр хайрлагсад бум түмээрээ байхад
Харин намайг л олохгүй нь юуны учир вэ

Үржинхандын шүлгүүдэд сүүлийн үед их дуртай болоод байгаа...

Таван амт